Matthew 20

Umzekeliso Wezisebenzi Esivinini

1“Ngokuba umbuso wezulu unjengomlimi owaphuma ekuseni kakhulu wayaqatsha amadoda okusebenza esivinini sakhe.

2Wathembisa ukubaholisa udenariyu okwalolosuku wasebathumela esivinini sakhe.

3“Waphuma njalo ngehora lesithathu wabona abanye bezimele nje emsikeni bengenzi lutho. 4Wabatshela wathi, ‘Lani hambani liyosebenza esivinini sami, ngizaliholisa okufaneleyo.’ 5Bahamba. “Wabuye waphuma ngehora lesithupha langehora lesificamunye wenza khona lokho.

6Sekusondele ihora letshumi waphuma wafumana abanye bezimele nje khonapho. Wababuza wathi, ‘Kungani kukade lilokhu limi lapha ilanga lonke lingenzi lutho na?’

7“ ‘Ngokuba kakho osiqatshileyo,’ batsho bemphendula. “Wathi kubo, ‘Lani hambani liyosebenza esivinini sami.’

8“Kwathi sekuntambama, umnininsimu wathi enduneni yezisebenzi, ‘Biza izisebenzi uziphe iholo lazo, uqalise ngabokucina usehla usiya kwabokuqala.’

9“Izisebenzi ezaqatshwa sekubanga ihora letshumi lanye zeza ngamunye zaphiwa udenariyu. 10Kungakho bathi sebefika labo abaqatshwa kuqala balindela ukuphiwa okwedlulayo. Kodwa ngamunye wabo waphiwa udenariyu. 11Bonela ukuyamukela baqalisa ukumsola umnininsimu besithi, 12“Lababantu abaqatshwe ekucineni basebenze ihora elilodwa kuphela, kodwa usubalinganise lathi thina esithwale kanzima ngomsebenzi sitshiswa lilanga usuku lonke.’

13“Kodwa waphendula omunye wabo wathi, ‘Mnakwethu, angikudlelezeli ngalutho. Kawuvumanga yini ukusebenzela udenariyu?

14Thatha umholo wakho uhambe. Mina ngithanda ukupha indoda leyo eqatshwe muva okulinganayo lalokho engikunike khona.

15Kangilalungelo na ukwenza loba yini engiyithandayo ngemali yami? Kumbe ulomhawu ngokuphana kwami na?’

16“Kunjalo owokucina uzakuba ngowokuqala, lowokuqala abe ngowokucina.”

UJesu Ubonisa Njalo Ngokufa Kwakhe

17Kwathi uJesu esesiya eJerusalema wathatha abafundi abalitshumi lambili wema labo eceleni wathi kubo, 18“Sesisiya eJerusalema lapho iNdodana yoMuntu ezanikelwa khona kubaphristi abakhulu labafundisi bomthetho. Bazayigwebela ukufa

19bayinikele kwabeZizwe ukuba iyangiswe, itshaywe njalo ibethelwe. Ngosuku lwesithathu izavuswa iphile!”

Isicelo Somzali Wesifazana

20Kwasekufika unina wamadodana kaZebedi kuJesu elamadodana akhe waguqa phansi wacela ukuthi ezwelwe.

21UJesu wabuza wathi, “Kuyini okufunayo na?” Yena wathi, “Thembisa ukuthi omunye wala amadodana ami amabili uzahlala kwesokunene kwakho kuthi omunye laye ahlale kwesokhohlo kwakho.”

22UJesu wathi kubo, “Kalikwazi elikucelayo. Lingayinatha na inkezo engizayinatha?” Bathi, “Yebo singayinatha.”

23UJesu wathi kubo, “Yebo kambe lizanatha kuyo inkezo yami, kodwa ukuhlala kwesokunene loba kwesokhohlo kakusikho kwami ukukuvumela. Izindawo lezi ngezalabo abazilungiselwe nguBaba.”

24Kwathi abalitshumi bekuzwa lokhu bazithukuthelela izelamani lezi.

25UJesu wasebabizela ndawonye wathi, “Liyakwazi ukuthi ababusi baleziZizwe bazibusa kalukhuni, kuthi lezikhulu zabo zikhonye phezu kwabo. 26Kakunjalo kini. Kodwa loba ngubani ofuna ukuba mkhulu phakathi kwenu kabe yinceku yenu, 27lalowo ofuna ukuba ngowokuqala kabe yisichaka senu – 28njengeNdodana yoMuntu engezelanga ukuzakhonzwa, kodwa ukukhonza, lokunikela ukuphila kwayo kube lihlawulo labanengi.”

Iziphofu Ezimbili Zenziwa Zibone

29Kwathi uJesu labafundi bakhe sebesuka eJerikho ixuku elikhulu labantu lamlandela.

30Amadoda amabili ayiziphofu ayehlezi eceleni komgwaqo. Athi esizwa ukuthi uJesu wayesedlula khonapho amemeza athi, “Nkosi, Ndodana kaDavida, sihawukele!”

31Ixuku labantu lawakhuza lathi kawathule, kodwa amemeza ngamandla athi, “Nkosi, Ndodana kaDavida, sihawukele!”

32UJesu wema wawabiza, wawabuza wathi, “Lifuna ukuba ngilenzeleni?”

33Aphendula athi, “Nkosi, sifuna ukuthi sibone.”

34UJesu wawazwela isihawu wawabambabamba emehlweni awo. Masinyane nje ahle abona asemlandela.